Суеркулова: комуз өнөрүн жайылтууда педагогдор колдоого муктаж
Ата-бабадан мураска калып, улуттун жүзү катары бааланган өнөрдү алып жүрүү өзүнчө маселе, ал эми аны туура үйрөтүп, кийинки муунга жеткирүү чоң жоопкерчилик. Мындай пикирин Ирина Суеркулова Sputnik Кыргызстан радиосуна маек куруп жатып билдирди.
Дипломдук иши дүйнөнүн 100 мыкты тасмасына кирген. Режиссёр Океев жөнүндө 9 факты
Анын айтымында, комуз өнөрүн жайылтуу үчүн бул жааттагы педагогдорду колдоо зарыл.
"Комузчулукту үйрөтүүдө биз музыка изилдөөчү Александр Затаевичке терең ыраазычылык билдиришибиз керек. Анткени ал XVIII кылымдын соңу XIX кылымдын башындагы комузчу ата-бабаларыбыздын күүлөрүн жаздырып сактап калган экен. Азыркы учурда Кыргызстанда комуз өнөрүн окутуу өзөгү ушул кишинин китебинин негизинде жүргүзүлөт. Акыркы жылдары комузчулар чет мамлекеттерге чыгып, жаштардын да бул улуттук аспапка болгон кызыгуусу артып жатат. Бирок бул жетишсиз. Анткени комузчулукту туура, так үйрөтүү, кийинки муунга сапаттуу өнөр калтыруу жоопкерчилиги турат. Бул үчүн мамлекет тарабынан олуттуу кадамдар жасалып, биринчи кезекте педагогдор колдоого алынуусу зарыл. Ошондой эле комуз күүлөрүн даңазалаган иш-чараларга жакшы көңүл бурулушу керек", — деди Суеркулова.
Педагог келечекте ар бир үй-бүлөдөн бирден адам комузда кол ойнотуп калган деңгээлге жетүү керектигин кошумчалады.
